Kaari Billi Ne Rasta Kaata

Sair-sapata nain matakka

Chhoro kar aayo tho pehle hi

Pher chhori dekhan maa chali

Toh Kaari billi ne rasta kaata

Saadi-vyaah ka mamla

Hai khel nahin guddon ka

Sach boley hai maa teri chhora

Khel hai yeh sikkon ka

Hawaa mahal ke bheetar

Selfie le aayo tho pehle hi

Pher luna lekar pundit aaya

Samay bura hai batlaya

Chokkhi vaat samajh le Bai Sa

Tass se mass nah hona

Jara si dheel aur laad-pyaar mein

Chhora haath se nikla

Phad phad karke maina se vaada

Kar aayo tho pehle hi

Pher phurrr karne ki subah hui

Toh bapu pinjra le aaya

Kaari billi ponga pundit

Duniya dusman ban jaye

Pran jaye par vachan na jaye

Tota mann mein ghurraye

Pyaar ke dusman haye haye

Tota mann mein ghurraye

Jaan ke dusman haye haye

Tota mann mein ghurraye…

Jeev Nashwar Hai

Atra tatra vichitra vichalit

Mann hi mann ka rog hai

Samast brahmand mujhme samaya

Phir kaisi maya kaisa bhog hai

Khol doon baahein meri

Ya mutthi mein Astitva samet loon

Kala aane se pehle

Khul ke jee loon ya roz thoda mar loon

Kabhi bhramit kabhi chakit kabhi bhaybheet ho jata hoon

Srishti ki sarjna mein keval ek praan-bindu banke reh jata hoon

Sarjan mein hi visarjan, utpatti mein hi samapti

Koi paheli, prashn ya phir uttar hai?

Kehte hain, jeev toh nashwar hai.

Jo Hai So Hai

Main kyun maru,

Main kyun thehroo,

Kisi aur ke liye,

Main kyun badloon,

Toh sun le saare,

Jo Hai So Hai.

Chhota kadd sanwla rang,

BMW doge toh le jayenge sang,

Yeh kehnewalo,

Bahot dekhe tum jaise nang,

Haath malte rehna,

Jab phailaon main apne pankh.

Main nah maru,

Main nah thehroo,

Kisi aur ke liye,

Main nah badloon,

Toh sun le saare,

Jo Hai So Hai.

Moti hai bhagayenge,

Crash diet karayenge,

Phir bhi jodi nahin jami,

Toh noton se tulvayenge,

Jodiyaan bananewalon,

Apni kali soch kali zubaan,

Kali kartutein match karo,

Phir bhi baat nah bane toh,

Muh pe kalikh pot ke nikal pado.

Main kyun maru,

Main kyun thehroo,

Kisi aur ke liye

Main kyun badloon,

Toh sun le saare,

Jo Hai So Hai.

Tere naam ka main kya karu?

Khud ko tarashu woh johri hoon main,

Teri soch aur shakti se pare,

Khud hi mein buland hoon main.

Main nah maru,

Main nah thehroo,

Kisi aur ke liye,

Main nah badloon,

Toh sun le saare,

Jo Hai So Hai.

Tumhari chuppi...

Tumhari chuppi mujhe khalti hai aise,

Raat ki girah mein subah qaid ho jaise.

Charo aur nazar ghumayi kaan lagaye,

Kis bhi disha se tumhari aawaz na aaye.

Mashhoor doston mein tha,

Dilon ke raaz jaan leta tha,

Tumhari aankhon mein jhanka toh sehem gaya,

Uljhano ki gehri khayi mein,

Bereham chuppi bhatak rahi thi.

Ateet ke kaun se saaye ne jakda hai tumhe?

Kyun ghum ho?

Darta hoon main,

Kahin tumhari dhundhli saansen mera gala na ghont de,

Marta hoon iss qadar,

Phir chahe tumhari aankhen mujhko ek raaz hi kyun na bana de.

Suno, Shiva!

Suno Shiva Aadi Anant,

Mann kaahe ko hai adheer ashaant?

Dekhoge mujhko bhole bhaav se,

Is aas mein bhatkoon ghaat ghaat.

Jogi bane phirte ho,

Khule kesh, vann wale bhes

Damroo bajate rehte ho

Shraap hi de do,

Jo kar doon tumhari shanti bhang,

Par do toh sahi,

Darshan dene se kyun muh mod rahe ho?

Suno Shiva, antim fariyaad

Mere haathon ho raha hai,

Ganga ghaat shankhnaad,

Yahin bas jaongi,

Tumse roothkar, ladkar, jhagadkar

Patthar ki moorat ban jaongi,

Phir kabhi na kahungi,

Suno, Shiva!

(Image from Google)

Mujhse Bura Na Koye!

Bangalore Delhi Mumbai mein, bura na mileya koye

Jo body khoji apni (Breasts, Vagina & Hips), mujhse bura na koye

Dhai akshar prem ke miley na miley

Chaar akshar RAPE ke gulli gulli miley

Iss darr se bada darr na koye,

Jo purse mein mere pepper spray

Aur pant mein teri danda hoye

Holi, Diwali ya New Year’s Eve hoye

Meri haalat pe Kabira bhi roye

Weaker sex ke liye tax kum hoye

Par consent of sex ke naam pe sirf dhokha hoye

Desh ke rakshakon ke liye ek political game hoye

Ghoom-phir ke mere western hone pe blame hoye

Power ko abuse karna tere liye mardonwali baat hoye

Teri niyat mere liye na-mardonwali baat hoye

Samajh na aaye yeh mamla kaise khatm hoye

Kya meri vagina mein AK47 ka installation hoye!?

Neend Ke Chaurahe Par Kuch Khwab Baithe Hain

Neend ke chaurahe par kuch khwab baithe hain

Khudko pura karne ka daawa karte huye

Inke main parr laga doon

Kehti hai subah aate huye

Par dekho,

Waqt ki niyat bhi ajeeb

Khwabon se poochhe, jaldi kya hai?!

Do pal thehro, thoda behko

Zindagi chalti mere ishare par hai

Main kahoon,

Yeh jo naya savera hai

Isme junoon bhar do

Kal roshan hone ke liye

Khwabon ko aaj sulagane do

Gaur se dekho,

Neend ke chaurahe par

Khwab yoon hi nahin baithe hai