Meri Lahoreiyat

Yeh sukoon bhi hai, junoon bhi hai

Ek aadat bhi hai, ibadat bhi hai

Mere andar bhi hai

Mere bahar bhi hai

Mita do chahe sar zameen

Saare ghar, vatan aur gul gulashan

Meri Lahoreiyat kaise mitaoge?!

Isme oogta hoon, isime doobta hoon

Nanhe-munne chehro par, main roz khushi se khilta hoon

Tere Jihad ki laptein mujhe nah daraye

Lahore hai mere daaye baaye

Chhalka do Chenab khoon se

Ya raakh kardo jahaan

Chheenn lo masoomiyat

Chahe mita hi do insaniyat

Meri Lahoreiyat kaise mitaoge?!

Nafrat ke shor mein bhi gunjati hai mohabbat ki vaadi

Agar yeh khel hai toh ab mere Lahore ki baari

Naazuk hai halaat magar iraadein mazboot

Lakhon duaon ke beech mera Lahore hai mehfooz

Chahe jala do makaan, sab yaadein aur tasveerien

Chahe mita do kone kone mein basi saans ki lehrein

Meri Lahoreiyat kaise mitaoge?!

...Meri Lahoreiyat mita nahin paoge.