Mere Subira-bhare pal

Tere aane se aaye hain, nanhe munne anginat gudgudate pal

Inhe aise mehfuz rakh loon, jaise rakha tha tumhe apne andar

Pani ko mutthi mein bandh karne ki koshish

Din mein bhi akash mein chand ko dekhne ki khwahish

Chhote chhote pairon se tez tez chalte hain

Dhabb karke girte hain aur hanskar phir chalne lagte hain

Kitna kuch karna hai, kitna kuch sikhna hai

Phir bhi aaj almast hain, yeh nange-punge pal

Inhe aise mehfuz rakh loon, jaise rakha tha tumhe apne andar

Mishri se bhi meetha, iska har shabd aadha adhura

Lalla lalla lori ka bas nahin chalta, yeh hai masti ka pitara

Khushi ya gusse mein, darr ya bhookh mein, boriyat ya shararat mein

Jagte huye chahe neend mein…  har baat mein angutha peete hain

Aur mil jaye jo pasand ki ‘cheese’ toh behad lablabate hain yeh pal

Inhe aise mehfuz rakh loon, jaise rakha tha tumhe apne andar

Itni choti si naak pe tevar itna bada

Phir bhi masoom hai, inhe koi fark nahin padta

Jis disha mein chaho, dhalne ko taiyar rehte hain

Ghar ke har kone mein, khil rahe hain befikr yeh pal

Inhe aise mehfuz rakh loon jaise rakha tha tumhe apne andar

Na maanu phir bhi kaala tika lagaun

Har burai har daravne sapne ko ek-ek kar todke kahin door phek doon

Aneko naye armaan aur umeedon ke beej inmein bo doon

Bahot pyaar aur samajhdari se bade ho rahe hain yeh pal

Inhe aise mehfuz rakh loon, jaise rakha tha tumhe apne andar

Tere aane se aaye hain, zindagi-bhare pal

Mere aur tumhare papa ke yeh Subira-bhare pal.